Leendert van Oostrum skryf in die Desember 2013 nuusbrief van die Pestalozzi Trust ’n artikel met die titel : “Onweerswolke dreig vir tuisonderwys”. Hiervolgens het die fenomenale groei van tuisonderwys in Suid-Afrika oor die laaste 20 jaar die aandag getrek van die staat, vakbonde en groot beleggers. Dit lyk of hierdie partye begin saamwerk om meer beheer oor tuisonderwys te kry. As ouers niks doen nie, en hierdie samewerking slaag, sal ouers die vryheid verloor om hulle tuisonderwys aan te pas aan die behoeftes van hulle kinders, en sal tuisonderwys vir meeste ouers onbekostigbaar word. Om hierdie kommerwekkende ontwikkelinge te stop moet ouers ingelig bly en tuisonderwys organisasies ondersteun.

Die fenomenale groei van tuisonderwys

Volgens die artikel was daar in 1994 ongeveer 50 tuisskolers in Suid-Afrika. In 2011 was tuisonderwys vir die eerste keer ingesluit in die sensus. Volgens hierdie sensus was daar in 2011 reeds 57 000 tuisskolers.

Die syfer van 57 000 impliseer dat daar ongeveer 130 leë skole ontstaan het en 2000 potensiële onderwysposte vakant geword het. Indien die gemiddelde tuisskoolgesin ongeveer R6000 per jaar spandeer aan tuisonderwys, is dit ’n mark van ongeveer 342 miljoen rand. Hierdie soort syfers trek die aandag van die drie-party alliansie van die staat, vakbonde en beleggers, wat begin aksies onderneem om hulle belange te bevorder in die tuisonderwyssektor.